Beiträge zum Symposium

• Alts Haus
  ×

  Alts Haus

  A alta bucklerda Hiddn lahnt wacklerd an der Straß, zwischer all die feschn Heiserkästn wussi in die Sunna reckn, lahnts bucklerd und krumm, die schmiern Lodn rogeklabbt, sehng Ahngdeckl gleich, der Putz bröcklt brüchi wie bei anner altn Frah, die ganz Gstalt runzlerd, falti, vo Fleckn ieberzoung, ieberol ah offna Wundn, schlechtverhalta Narm. lech hers stöhna, wies schwer und lätscherd schnauft, is Lehm scho aufgegehm. Ouschuppsn mecherdis, aufriddln, a weng a Hoffnung eihaung. Sie mecht keinen Muxer, schwermieti kniets am Straßerrand und ward, ward, daß der Dod verbeigfohrn kummt.

  Schließen
• Bosen und Co.
  ×

  Bosen und Co.

  Scheena weisa Heisli, der Rosn sauber orasierd, mit Zweitwong aufm Pflaster, die Fassadn auf Hochglanz polierd. Zierstreicher und Plastiktulpm zwischer viel Bedong und Stah, kaum Leid, ka Kinner auf der Stroß, oum hinter am offna Fenster glotzt a alta Froh. Becknauto in der Frieh, bei anner Verfolchungsjachd, edlia Gschäftli, obber nirgnds a richtier Lodn, bloß unterm Dooch alla zwah Stundn a Bus, die Zunga bleckn is gwieß streng verbotn. A Kriecherdenkmol feiert die Heldn, fremda Gsichter grießn auf Schritt und Tritt, zwah Turmspitzn weisn kerzergrod in Himml, im Kerchhouf wern die Gräber zugschitt. Blechbixn flackn im Grom, wu hemmsi die Bauern versteckt? Nach die Spurn vo frieher suchtmer vergeblich, is Lehm is dick mit Eternit zugedeckt.

  Schließen
• Denk mol
  ×

  Denk mol

  Elendia Stah, zwah Dutznd verfault, zerfressn, am Boudn. Weit wech im Wald, mid Einsturzgefahr. A bor ahnzlna fremda Noma. Und im Eck a undeitlier Satz Umgekommen zwischen 1943 und 1945. Kans mehr do, wu die Noma spricht, Stahli auf die Grobstah schlicht. Die drei Stahblöck im Dorf, stocksteif, glattkanti und stolz. Sticker hunnerd Noma, wu goldia Heldn riehma. A Haufm Zohln in Reih und Glied. Und dann zwah Versli: Eure Taten sind unermessen Eure Namen sind unvergessen. Warum miech sedda Sprich immer widder aufstoßn missn?

  Schließen
• Komischa Leid
  ×

  Komischa Leid

  Statt Gudd Morng zischns "Gmorje", zu Griss Godd songs jedsmol "Daaach", Kerng haßt beina "Kirsche", sie denna ned schmarrn, sie "dischbediere" odder "sahn". A stinkerds Kuhkaff wird zum "Derfsche", a alta Scheiern zu an "Schuppe", die einfache Stadtworscht haßns "Lioner", essn "Abblmuus" zu der Suppm. Wenns strunzbsuffm senn, hemms "enner sitze", ondauernd kummers derher mid "hamm" und "hann", ihr "Kapp" aufm "Kopp" is in Werklichkeit a Mitzn, und wenni her, "des dudd meer gefalle", vergeddmer jede Freid. Mei lieber Mann, do binni wuhie grodn, es gidd ganz schee komischa Leid.

  Schließen
• Saarland
  ×

  Saarland

  ---

  Erst die Keltn Dann die Römer Die Frankn Bayern Oldnburcher Deitschn Franzousn Und ezz Ah nu iech.

  Schließen